تورپاق

كيان صفري

خوجالي شهيدلرينين خاطيره سينه :
ائوين ائشييينده قار شيددتله ياغماقدايدي. «شاميل» پنجره اؤنونده دايانيب قارانليق حيه‌‌طه اورتاليغينداكي شاختايا ، بورانا دؤزه‌ن يالقيز توُت آاجينا باخيردي.
يئنيجه دؤيوش بؤلگه‌سيندن يئتيشيب، هله أينينده‌كي دؤيوش پالتاريني ده‌ييشمه‌ميشدي. اصلان اوتاغين سوكوتونو سينديردي:
ـ اوغلوم شاميل! دؤيوش بؤلگه‌لرينده نه وار ـ گل اوتور سؤيله گؤره‌ك!
او آتاسينا ساري دؤنه‌رك ، آرام لحن ايله : «آتا! تئزليكله بورادان گئتمه‌لي‌ييك.» ـ دئدي.
ـ نئجه، نه دئدين، بورادان گئنكه‌لي‌ييك، نييه اوغلوم نه اوچون؟!
ـ هر آن ايمكاني وار قوُدوز دوشمن بورايا باسقين ائتسينلر. جبهه‌لرده دوروم ياخشي دئييل. دوشمن وار گوجويله يوروش ائتمكده دير. بو گون ـ صاباح ...
ـ يوخ اوغلوم من بو شهري ترك ائده بيلمرم، خوجالي منيم دوغما يوردوم دور. من بورادا بوي آتميشام، ياشا دولموشام. نئجه من بورالارين داغ ـ داشيندان ، سرين سولاريندان، مئشه‌لريندن أل چكه بيلرم منيم هر زاديم بورادادير. من بورادا كؤك سالميشام.
شاميل دريندن كؤكس اؤتوردو:
ـ آتا من سني ياخشي باشا دوشورم، آمما نه ائتمك اولار. بو گون ـ صاباح او ديغالارين آياغي بورايا آچيلسا ، هئچ كيمسه‌يه رحم ائتمه‌يه‌جكلر. اونلار ديريلر قالسين بير يانا، اؤلولره ده رحم ائتميرلر. هانسي كندده، قصبه‌يه چاتيرلار قبيرلري ده سؤكورلر. آتا! چوخ چتين گونلر كئچيريريك. دوشمن گون به گون تورپاغيميزدا ايره‌لي‌لمكده‌دير.
اصلان اوره‌يينده آغير بير درد حيس ائديردي. اونون يانيندا اوتوران بالاجا او‎ْغلان نوه‌سي دانيشيقلارا قولاق آسيردي. آتا اوغلونون دئديكلريندن بئله راحاتجاسينا كئچه‌بيلميردي. آخي او، اؤزو ده ايكينجي دونيا محاربه سينده چتين گونلره راست گليب، محاربه‌ني ياخيندان تجربه ائتميشدي. باشيني آياق اوسته دوران اوغلونا ساري قوْوزادي. شاميل اونون ايكي گؤزونون درينلييينده نفرتله انتقام حيسّيني دوُيوردو.
سسينده آيدينجا آنلاشيلمايان بير غم واريدي:
-اوغلوم!تورپاغي كي باشينا بوراخيب ،دوشمنه وئرمك اولماز.بو تورپاقدان هره نين بير پايي وار.هامي ايمكان قده ر اؤز پاييني قورومالي دير.اونون قارشيسينداكي وظيفه‌ميز چوخ آغيردير . قارينج-قارينجيندان وار گوجوموزله مدافعه ائتمه‌لي‌ييك. اولورسا بو تورپاغي چييينلريميزده داشيمالي‌ييق. آمما اونو دوشمن الينه وئرمه‌‌مه‌لي‌ييك. من بيلميرم بس سيزلر نئيليرسيز، اؤلكه‌ميزين ميللي اوْردوسو نييه دوشمن باسقيني‌نين قاباغيني آلمير؟!
ـ آتا بيرين بيليرسن، بيرين بيلميرسن. دوشمن باشدان ـ آياغاجان سيلاحلانيب، روس ايمپرياسي آمريكا، فرانسا، آيري بوينو يوغون اؤلكه‌لرله بيرليكده قالماسين يارديمي ائرمنيلره ائله‌ييرلر. اونلارين كؤمه‌يي اولماسايدي، ائرمنيلر كي جرأت ائديب بيزيم توْرپاقلارا گؤزلرينين اوُجو ايله ده باخما بيلمزديلر. قالدي بيزيم اؤز اوردوموزون احوالاتي، آدام اوتانير سؤزونو دانيشسين. دؤيوش بؤلگه‌لرينه اولان قوّه‌لريميز وار گوجلري ايله دؤيوشورلر. قانلاريندان، جانلاريندان كئچيرلر، آنجاق تأسفلر اولسون كي چاتيشمامازليقلاردا آز دئييل. گؤرورسن نئچه گون اولور كي آرخا جبهه‌دن اوْردويا يارديم اوْلونمور. الي بوش، آرخاسيز دوشمن اؤنونده نه ائتمك اولار.
اصلا‌ن”ين گؤزلري ياشارميشدي:
ـ ايلاهي نه گونلره قالديق، گؤره‌سن آخريميز نئجه اولاجاق. كاشكي ال ـ آياغيمدا گوج اولايدي، سيلاح گؤتوره بيله‌يديم. اوندا اونلارا گؤستره‌رديم كي آذربايجان تورپاغيندا او آلچاقلارا يئر اولا بيلمز.
بالاجا اوشاق هوروت ـ هوروت بؤيوك آتاسينا باخيردي:
ـ اصلان بابا سن قوجالميسان، داغدا قاچا بيلمزسن، قوي من آتاملا گئديم دوشمنله دؤيوشوم.
اصلان اليني اونون باشينا چكه‌رك:
ـ آي ساغ اول منيم قو‎ْچاغيم! آمما واقف! سن هله چوخ بالاجاسان، بؤيويئب بويا ـ باشا چاتماليسان، سن بؤيويه‌نه آللاه ايسترسه محاربه قورتارار، امن ـ آمانليق اولار.
×××
نئچه گون ايدي كي اصلانين عايله‌سي شاميل‌ين اصراري ايله خوْجاليني ترك ائديب آغداما گلميشديلر. او گونلرده خوجاليني ترك ائده‌ن عايله‌لرين سايي چوخ آز ايدي.
دؤيوش بؤلگه‌لرينده قيزغين محاربه گئديردي. دوشمنين اشغال ائتدييي تورپاقلار گون به گون آرتيردي. آرتيق گوللـه‌لرين، بوْمبالارين پارتلاماسيني خوْجالي‌نين ياخينليغيندا ائشيتمك اولوردو.
چوخ چكمه‌دي كي راديو ـ تلويزيون واسيطه‌سيله دهشتلي، آجي بير خبر ائشيديلدي:
ائرمني قوّه‌لري وحشيجه‌سينه خوْجاليدا يوزلرله گوناهسيز اينساني اؤلدوروب، ائولريني يانديريب داغيتميشلار.
بو سارسيديجي خبر اؤلكه ده بومبا كيمي سس ساليب، هاميني غم، كدره چولغادي. خوجالي اطرافيندا يئرله‌شن قارقار ساحيلينده كي مئشه‌ده هله‌ده آرابير گوللـه سسي ائشيديليردي. مئشه‌يه پناه آپاران سيلاحسيز اهالي آجليقلا، شاختا ـ بوْرانلا مبارزه ائتديكده هارادا وحشي دوشمن واسيطه‌سيله تاپيليرديرسا گوللـه‌لنيب، يادا اسير توولوردولار. اوْنلار نه قوجايا نه ده آرواد ـ اوشاغا رحم ائتمه‌ييرديلر.
مئشه‌نين بير بوجاغيندا شاميل اؤز دسته‌سي ايله بيرليكده ووروشاراق نئچه آرواد ـ اوشاغي تهلكه‌دن قورتارماق ايسته‌ييردي. او بو ايشي گؤره بيلسه‌ده بو يولدا نئچه حرب يولداشيني الدن وئريب، اؤزو ايسه قوْلوندان شيددتله يارالاندي.
×××
«آغدام»ين دام ـ دوواريندان كدر ياغيردي. سانكي «آغدام»، «خوجالي»يا ياس توُتموشدو. شاميل آخشام چاغي‌نين سوْيوغو دوشمكده يورغون ـ آرغين گليب، ائوه چاتدي. بالاجا واقف هؤوله‌سك آتاسي‌نين قوجاغينا قاچيب، شنليك ائديردي:
ـ دئ گؤروم آتا دوشمن قوّه‌لريندن نئچه‌سيني اؤلدوردون، خوْجاليداكي ائويميزي قوْرويا بيلدينمي؟
آتا باشيني آشاغي سالاراق : «سؤيله‌يه‌جه‌يم» دئدي. اصلان كيشي چلييينه سؤيكه‌نه‌رك يارالي اوغلونو باغرينا باسدي:
ـ اوغلوم يارالانميسان؟! هانسي الي قوُروموش قولونا گوللـه ووردو؟
شاميل دولوخساندي:
ـ آتا خوْجاليني اشغال ائتديلر. ائرمنيلر هاميني اؤلدوروب، يا دا اسير توتدولار. ائولريميزي داغيتدبلار، تورپاقلاريميزي قوْرويا بيلمه‌ديك آتا!
بو آندا واقف سورعتله اوتاقدان چيخيب، تئزليكله الينده بير پارچا ايله اونلارين يانينا قايتدي. او پارچاني اصلان كيشي ايله آتاسي‌نين گؤزلري اؤنونده آچدي:
ـ بير باخين بورا من اؤز پاييمي قوْروموشام.
پارچا آراسيندا ايكي اوووج قده‌ر خوجالي توْرپاغيندان وار ايدي. اصلان بير حالداكي ياشلي گؤزلرله اوشاغي سيخ باغرينا باسميشدي شامسل الينده‌كي سيلاحي مؤحكم‌جه‌سينه سيخيردي.

:http://arghish.com/hikayeler.htm#tor